Download

Why does your brand sae drap wi bluid,
Edward, Edward,
Why does your brand sae drap wi bluid,
And why sae sad gang yee O?"
"O I hae killed my hauk sae guid,
Mither, mither,
O I hae killed my hawk sae guid,
And I had nae mair but he O."

"Your hawks bluid was never sae reid,
Edward, Edward,
Your hawks bluid was never sae reid,
My dear son I tell thee O."
"O I hae killed my reid-roan steed,
Mither, mither,
O I hae killed my reid-roan steid,
That erst was sae fair and free O."

"Your steed was auld, and ye hae got mair,
Edward, Edward
"Your steed was auld, and ye hae got mair,
Sum other dule ye drie O."
O I hae killed my father dear,
Mither, mither,
O I hae killed my father dear,
Alas, and wae is me O!"

"And whatten penance will ye drie for that,
Edward, Edward,
And whatten penance will ye drie for that?
My dear son, now tell me O."
"I'll set my feet in yonder boat,
Mither, mither,
I'll set my feet in yonder boat,
And I'll fare o'er the sea O."

"And what will ye dae wi your towirs and your ha,
Edward, Edward?
And what wil ye dae wi your towirs and your ha,
That were sae fair to see O?
"I'll let them stand til they doun fa,
Mither, mither,
I'll let them stand till they doun fa,
For here never mair maun I be O."

"And what will ye leave tae your bairns and your wife,
Edward, Edward?
And what will ye leave tae your bairns and your wife,
When ye gang over the sea O?"
"The world's room, let them beg through life,
Mither, mither,
The world's room, let them beg through life,
For them never mair will I see O."

"And what will ye leave tae your ain mither dear,
Edward, Edward?
And what will ye leave tae your ain mither dear?
My dear son, now tell me O."
"The curse of hell fae me sall ye bear,
Mither, mither
The curse of hell fae me sall ye bear,
Sic counsels ye gave to me O."